1. എന്‍ജിനീയറിംഗ്, മെഡിക്കല്‍ കോഴ്സുകള്‍ (എം.ബി.ബി.എസ്, ബി.ഡി.എസ്, ബി.എ.എം.എസ് ബി.എച്ച്.എം.എസ്., ബി.എസ്.സി. നേഴ്സിങ്ങ്) എം.ബി.എ.,എം.സി.എ., എം.എസ്., എം.ഡി., എം.ഡി.എസ്.,എം.എസ്.ഡബ്യൂ തുടങ്ങിയ പ്രൊഫഷണല്‍ കോഴ്സുകള്‍ക്കും ബാങ്ക് അംഗീകരിക്കുന്ന ഇതര കോഴ്സുകള്‍ക്കും പഠിക്കുന്നതിനു വേണ്ടിയാണ് ഈ പദ്ധതി പ്രകാരമുളള വായ്പ അനുവദിക്കുന്നത്. 2. കേരളത്തിനകത്തും പുറത്തും വിദേശത്തുമുളള ഗവണ്‍മെന്‍റ് /സഹകരണ / ഗവണ്‍മെന്‍റ് അംഗീകൃത പ്രൈവറ്റ് സ്ഥാപനങ്ങളില്‍ വിദ്യാഭ്യാസം നടത്തുന്നതിനു മാത്രമേ ഈ പദ്ധതി പ്രകാരം വായ്പ അനുവദിക്കുകയുള്ളു. 3. പരമാവധി വായ്പാത്തുക 25 ലക്ഷം രൂപയായിരിക്കും. പഠിക്കുന്ന സ്ഥാപനത്തിന്‍റെ മേലധികാരി ശുപാര്‍ശ ചെയ്യുന്ന മുറക്ക് ഓരോ സെമസ്റ്ററിനും ആവശ്യമുള്ള തുക വായ്പയില്‍ നിന്നും ബന്ധപ്പെട്ട അധികാരിയുടെ പേരില്‍ ഡിമാന്‍റ് ഡ്രാഫ്റ്റായി വിതരണം ചെയ്യുന്നതാണ്. പുസ്തകം, പഠനസാമഗ്രികള്‍ തുടങ്ങിയവ വാങ്ങുന്നതിനുളള തുക പണമായി വിതരണം ചെയ്യുന്നതാണ്. കോഴ്സിന്‍റെ പ്രാഥമിക ചെലവിനുവേണ്ടി വരുന്ന തുകയും പണമായി നല്‍കാവുന്നതാണ്. വിദേശത്ത് പഠിക്കുന്നതിന് വേണ്ടി അനുവദിക്കുന്ന വായ്പകളില്‍ പാസ്പോര്‍ട്ട്, വിസ, എയര്‍ടിക്കറ്റ് എന്നിവ ഹാജരാക്കുകയാണെങ്കില്‍ വായ്പത്തുക പണമായി വിതരണം ചെയ്യാവുന്നതാണ്. 4. പ്രൊഫഷണല്‍ കോഴ്സിലേക്ക് പ്രവേശനം ലഭിച്ച കുട്ടിക്ക് 18 വയസ്സ് തികഞ്ഞിട്ടുണ്ടെങ്കില്‍ കുട്ടിയുടെ പേരിലും പതിനെട്ട് വയസ്സില്‍ താഴെയാണ് പ്രായമെങ്കില്‍ രക്ഷകര്‍ത്താക്കളുടെ പേരിലുമായിരിക്കും വായ്പ അനുവദിക്കുന്നത്. ഈ വായ്പയില്‍ രക്ഷകര്‍ത്താവ് / വിദ്യാര്‍ത്ഥി Co-Obligant ആയിരിക്കും. 5. പ്രൊഫഷണല്‍ കോഴ്സിന് പ്രവേശനം ലഭിച്ചു എന്നത് തെളിയിക്കുന്നതിനാവശ്യമായ സര്‍ട്ടിഫിക്കറ്റ് പ്രവേശനം ലഭിച്ച സ്ഥാപനത്തില്‍ നിന്നും ഹാജരാക്കേണ്ടതാണ്. 6. രണ്ട് ലക്ഷം രൂപ വരെയുളള വായ്പകള്‍ രക്ഷകര്‍ത്താവിനെ കൂടാതെ ഒരു ഉദ്യോഗസ്ഥ ജാമ്യത്തില്‍ അനുവദിക്കുന്നതാണ്. അച്ഛനും അമ്മയും ഉദ്യോഗസ്ഥരാണെങ്കില്‍ മറ്റ് ഉദ്യോഗസ്ഥ ജാമ്യം നിഷ്കര്‍ഷിക്കേണ്ടതില്ല. അച്ഛന്‍റെ / അമ്മയുടെ പേരിലാണ് വായ്പ അനുവദിക്കുന്നതെങ്കില്‍ ഇവര്‍ രണ്ടു പേരും ഉദ്യോഗസ്ഥരാണെങ്കിലും മറ്റ് ഉദ്യോഗസ്ഥ ജാമ്യം നിഷ്കര്‍ഷിക്കേണ്ടതില്ല. രണ്ടു ലക്ഷത്തിനു മുകളിലുളള വായ്പകള്‍ വായ്പത്തുകയുടെ 170% മതിപ്പ് വിലയുളള വസ്തുവിന്‍റെ ഈടിന്മേൽ അനുവദിക്കുന്നതായിരിക്കും. എന്നാല്‍ അച്ഛനമ്മമാര്‍ ഉദ്യോഗസ്ഥരാണെങ്കില്‍ വായ്പത്തുകയുടെ തുല്യവില മതിക്കുന്ന ഈടു വസ്തു മതിയാവുന്നതാണ്. 7. വിദ്യാഭ്യാസ വായ്പയുടെ കാലാവധി: കോഴ്സിന്‍റെ ദൈര്‍ഘ്യവും പ്രത്യേകതകളും അനുസരിച്ച് പരമാവധി 100 മാസം വരെ കാലാവധിഅനുവദിക്കാവുന്നതാണ്. പഠന കാലാവധി കഴിയുന്നതു വരെ മാസം തോറും പലിശ മാത്രം അടച്ചാല്‍ മതിയാകുന്നതാണ്. പഠനം കഴിഞ്ഞ് ഏഴാം മാസം മുതല്‍ മുതലും പലിശയും പ്രതിമാസ തവണകളായി അടച്ചുതീര്‍ക്കേണ്ടതാണ്. 8. വായ്പാ പ്രമാണങ്ങള്‍ ഹാജരാക്കുന്ന മുറയ്ക്ക് മാത്രം പരിധി അനുവദി ക്കേണ്ടതും വായ്പാക്കാരന്‍റെ ആവശ്യത്തിനനുസരിച്ച് രസീതു വാങ്ങി വായ്പാക്കണക്കില്‍ ചെലവെഴുതേണ്ടതുമാണ്. 9. സാധാരണ വായ്പയ്ക്ക് ബാധകമായ മറ്റെല്ലാ വ്യവസ്ഥകളും ഈ വായ്പയ്ക്ക് ബാധകമായിരിക്കുന്നതാണ്. |